जुनेली हौ तिमी !

-सूर्य चापागाईँ

तिमी जून हौ कि जुनेली तिमी हौ !
कतै पूर्णिमाकी उजेली तिमी हौ !

भयो बाग प्यारो तिमी आउनाले
जसै चिर्बिरायौ जुरेली तिमी हौ !

कढा धूपमा सासको धाप बढ्दा
खडेरी पवनकी सुरेली तिमी हौ ।

तिमी बग्दछ्यौ गीतझैँ यी नयनमा
नदीको नीलो नागबेली तिमी हौ ।

तिमी हाँस्दछ्यौ मञ्जरी पालुवामा
वसन्ती छटाकी चमेली तिमी हौ ।

उषा हौ तिमी प्रात भै साथ चल्ने
सधैँ ‘सूर्य’लाई सहेली तिमी हौ ।

कुरुले तेनुपा, धनकुटा ।

प्रतिक्रिया दिनुहोस्

*