सभासद् कि साढे सात ?

-हिरालाल आचार्य ‘अनारबाजे’
उज्यालोको आश थियो ल्यायौ कालो रात
सभासद् हौ कि तिमी हौ कि साढे सात ।

जुवाजस्तै राखिदियौ देश आज दाउमा
नदीबीच हेलिदियौ माझी छैन नाउमा ।

कोही बने रावण आज कोही बने कंस
मधेस पहाड फुटाएर लगाउँदैछन् अंश ।

पठाएका थियौ भोट दिइ बजाइ ताली
आफ्नै बोली अशुद्ध भो गर्दा यिनलाई गाली ।

नारायणहिटीबाट हटे बाह्र पुस्ते राजा
छ सय एक बनी जन्मे बानेश्वरमा आज ।

चार वर्ष बित्न लाग्यो संविधान बन्दैन रे
कारण के हो जनतालाई कसैले नि भन्दैन रे ।

मन्थली, रामेछाप

प्रतिक्रिया दिनुहोस्

*